Lig in Duisternis Uitgewers het die voorreg gehad om die Drie Formuliere van Eenheid in Hindi te vertaal – ʼn projek wat voortspruit uit ‘n besoek aan Indië in 2020.

Ons het betrokke geraak by die teologiese opleiding van Indiese Christenpredikante met ‘n passie vir die evangelie, maar wat nie noodwendig die formele teologiese opleiding het nie. Tydens ons eerste besoek is die dringende behoefte aan ‘n goeie vertaling van die Drie Formuliere van Eenheid in die Indiese spreektaal geïdentifiseer.

Lig in Duisternis Uitgewers beoog om die publikasie onder leiding van di. Schalk Strauss en Johan Schütte op 19 Januarie 2025 in Pune, Indië bekend te stel. Die bekendstelling gaan DV hand aan hand met ‘n konferensie waartydens die Heidelbergse Kategismus met 20 plaaslike Christenpredikante behandel word.

Ons glo vas aan ons roeping om die evangelie verder as ons grense uit te dra, en te verseker dat Christenpredikante die suiwer leer, soos wat dit in ons belydenisskrifte verwoord is, verkondig.